व्यक्तिमत्व परीक्षा (Personality Test): हे बहुआयामी साधन एक करिअर चाचपणी, जोडीदार समुपदेशन व व्यक्तिमत्व परीक्षण यासाठी वापरले जाते. हे मानसशास्त्रज्ञ व समुपदेशक यांच्याद्वारे व्यक्तिमत्वानुरूप नोकरी/व्यवसाय सांगण्यासाठी वापरले जाते. तसेच काही समस्या ओळखण्यासाठी जसे, काळजी, वर्तन, सामंजस्य, शैक्षणिक, भावनिक व सामाजिक.

वर्तणूक परीक्षण (Behavior Test):  हे एक व्यक्तिमत्व परीक्षणाचे असे साधन आहे ज्यात हे पाहिले जाते की आपण इतरांशी कसे वागतो व इतरांकडून काय अपेक्षा करतो किंवा कशा वर्तनाची अपेक्षा करतो. याचे आकलन आपल्याला स्वतःचे व दुस-यांचे वर्तन समजण्यास मोठी मदत करते. बहुतेक सर्व व्यक्तिमत्व परीक्षणाची साधने ही व्यक्तीच्या गुणावगुणांचे परीक्षण करतात, त्यांच्या संबंधांच्या स्वरूपाचे नाही. परस्पर गरजा व वर्तनावर प्रकाश टाकण्यासोबत ही परीक्षा त्यातील सुधारणा व परिणामकारकता वाढविण्यासाठी काही सूचनाही देते.

व्यक्तिचित्र काढा (Draw A Person Test): व्यक्तिचित्र काढण्याची परीक्षा मॅकओव्हर ने १९४८ मध्ये तयार केली व ती चित्रे परीक्षा देणा-याची काळजी, लहरीपणा, स्वाभिमान व व्यक्तिमत्व कसे व्यक्त करतात याकडे लक्ष देते.

थिमॅटीक ऍपरसेप्शन परीक्षा (Thematic Apperception Test): ही परीक्षा एखाद्या व्यक्तीचे अमूर्त (प्रोजेक्टीव)परीक्षा साहित्याबद्दल विचार, दृष्टीकोन, निरीक्षणशक्ती व भावनिक प्रतिक्रिया तपासते. या परीक्षेतील अमूर्त (प्रोजेक्टीव) परीक्षासाहित्य म्हणजे कार्डांचा एक संच असतो ज्यात विविध आकार व स्थितींतील मानवी आकृत्या असतात.

हस्ताक्षर परीक्षण (Handwriting Analysis: (Graphology)): हस्ताक्षर परीक्षण म्हणजे हस्ताक्षर व व्यक्तिमत्व यांतील संबंधाचा अभ्यास. हस्ताक्षर परीक्षण तुमची अनेक वैशिष्ट्ये जसे चारित्र्य, भावना, प्रज्ञा, सर्जनशीलता, सामाजिक तडजोड, तुमच्या इच्छा, भीती, उणीवा, बलस्थाने व लैंगिक भूक इ. सांगू शकते.